الدنيا حلوه

ما تحسون مرات إن ودكم تعطون وتعطون وتعطون بس طاف !! 

ما تحسون إن صار عادي عندك كل شي وما عاد يهمك شي غير إنك تمشي يومك ! 

جم واحد منا مر عليه هالشعور ! ،، وايد وايد وايد 💔 

بس بالآخر اهيه مرحله وتعدي من كثر ما تعبنا ومن كثر ما عطينا ومن كثر ما اهتمينا ما بقى فينا احساس نعطي أكثر ،، ما بقى فينا روح تهتم أكثر ... 

وايد ودي أنسى شغلات بحياتي صارت مو بس انساها ،، اشلعها شلع ،، احرقها ولا جنها صارت ...

بس لحظه ! 

مو هاذي اهيه نفس الأشياء اللي خلتني أصير اقوى ! 

مو هاذي اهيه الاشياء اللي خلتني استوعب الدنيا أكثر ! 

مو هاذي الاشياء اللي عدت اهيه نفسها تعطيني دافع اذا حاشتني مشكله ، إني بعديها وبنسى وبعيشها و إن بعد هذا كله في وناسه ناطرتني ..! 

أيـــه ... اهيه نفس الأشياء اللي أبي انساها نفسها اللي بتخليني أحس وأفهم واستوعب حياتي ودنيتي وكل شي حولي ...

ترى عادي اللي يصير ويانا وعلى قولتهم " كلن شايل بقلبه شقى ليله " ،، منو منا مرتاح بحياته ؟ منو منا ما عنده شي يخاف عليه ويحاتيه ؟ منو منا ما عنده شي يداريه ؟ 

كلنا عندنا شي ما نبي أحد يعرفه ونداريه ونخاف عليه ونهتم فيه كثر ما نقدر ،، وايد مرت علي لحظات كنت أكره نفسي واتمنى لو إني اموووت بس استغفر ربي واتذكر " قل لن يصيبنا إلا ما كتب الله لنا "  ، واتذكر بعد " و عسىٰ أن تكرهوا شيئا وهو خير لكم " ...

وايد أشياء كرهناها بحياتنا بس بنهايتها كان في وايد خير لنا ...

بكل مصيبه تمر ..

بكل مشكله تمر ..

تعرف منو يعزك وشاريك ،، تعرف منى يحبك ،، تعرف منو مستعد يضحي عشانك ،، تعرف منو اللي وده يساعدك ،، و أنا أقول الناس ما يبين معدنها إلا بهالسوالف ... 

ياما ناس طاحوا من عينا من بعد جذي مواضيع وناس غيرهم كبروا بعينا وصارلهم معزه وبعضهم كنا ما نبلعهم بالمره ولكن شاءت الأقدار .... 

الله يعينكم كلكم ويحفظ لكم كل غالي ويحفظ لكم بالأخص الانسان اللي كل ما ضاقت عليك تلاقيه يفتحها جدامك بكلمتين صغار .. 

وأكثر كلمه كانت تهون علي " فطوم لا تتضايقين ترى الله كاتبلج شي وايد حلو جدام ينسيج هذا كله " ،، هالكلمه دايما اسمعها من اختي وصديقه عمري فجر الله يخليها لي أبسط شي يطلع منها من كلام يكون بالنسبه اللي الضو اللي ينور طريجي وانا متضايقه .... 

#ترى_بس_تحلطم :) 

#فاطمه السالم